АҚШ-тың Қазақстандағы елшілігі Украина туын іліп қойды

АҚШ-тың Қазақстандағы елшілігі қасбетіне Украина туын іліп қойды, деп хабарлайды ведомствоның баспасөз қызметі.

«Бүгін біз Ресей күштерінің осы егемен елге себепсіз басып кіруіне жауап әрі Украинамен ынтымақтастық белгісі ретінде елшілігімізге Украина туын іліп қойдық» деп түсіндірді елшілік.

Бұған дейін батыс көшбасшылары Ресей президенті Владимир Путиннің Украинаға соғыс ашуынан кейін оның психикалық тұрақтылығына күмән келтіргені туралы жазған болатынбыз.

Олардың пайымдауынша, 69 жастағы Ресей президенті жақында коронавирусқа қарсы сақтық шараларынан кейін тұйықталып кеткен. Ол бүгінгі әлемнен бет бұрып, тарихты қазбалап, ұлы болуға ұмтыла бастағандай.

Басылым Путинмен бұрыннан таныс Франция президенті Эммануэль Макронның сөздерінен үзінді жариялады.

Қазір Украинада Киев және басқа да ірі қалалар үшін ауыр шайқастар жүріп жатыр.