АҚШ-та Covid-19-дан 500 мың адам қайтыс болды. Байден бес күндік аза тұту жариялады

Бес күн аралығында елдегі барлық жалаулар түсіріліп, коронавирус құрбандарын еске алу үшін шырақтар жағылады.

АҚШ президенті Джо Байден Covid-19 құрбандарына бес күндік аза тұту жариялады. АҚШ-та коронавирустан жарты миллион адам қайтыс болды.

Аза тұту рәсімі Ақ үйде өтеді. Джо Байден, Джил Байден, вице-президент Камала Харрис жұбайы Дуглас Эмхофпен бірге шырақ жағып, бір минут үнсіздік өткізеді.

Ақ үйдің баспасөз-хатшысы Джен Псаки Байден бес күн ішінде барлық федералды нысандарда АҚШ жалауларын түсіруді бұйырғанын мәлімдеді.

Джонс Хопкинс американдық университетінің мәліметі бойынша, АҚШ-та қайтыс болғандардың саны 499 309 адамды құрайды, пандемия басталғаннан бері 28 149 697 адам індет жұқтырды. Worldometers сайтының деректері бойынша АҚШ-тағы коронавирус құрбандарының саны 511 мыңнан асты. АҚШ Covid-19 таралуы мен өлім-жітімінің статистикасында бірінші орында.