АҚШ-та қазақстандық азамат суицид жасамақ болған әйелді құтқарып қалды

Америка Құрама Штатында көпірден секірмек болған әйелді құтқарып қалғаны үшін қазақстандық Ақжан Аңсағановқа марапат табысталды.

Оқиға 2 қарашада Гавайи штатының Гонолулу қаласында болған. Журналист Талғат Аманов жаңалықпен өз Instagram парақшасында бөлісті.

Шығыс Қазақстан облысы Теректі ауылының тумасы көлік көп жүретін көпір үстінде кетіп бара жатып суицид жасауға әрекет жасаған қызды бірінші болып байқаған. Ақжан Аңсағанов көп ойланбастан қызды құтқару үшін оны құшақтап алған, өтіп бара жатқан жандар да қол ұшын созған. Осылайша олар аффект жағдайындағы қызды полицейлер келгенше ұстап отырды.

Басынан өткен оқиға туралы Ақжан Аңсағанов ешкімге айтпаса да Гонолулу қаласының мэрі Рик Бланджарди бұл жаңалықты естіп, қазақстандық жігітті іздеп тауып, марапат ұсынған. Ақжанға 8 қараша күні алғыс табыстап, дәл осы күнді Гонолулу қаласы үшін Ақжан Аңсағанов күні деп жариялады.