АҚШ құрғақшылықтан зардап шеккен маңғыстаулықтарға көмектеседі

АҚШ-тың халықаралық даму агенттігі Маңғыстау облысындағы құрғақшылық салдарынан зардап шеккен халықты қолдау үшін 100 мың доллар грант бөледі.

Бұл туралы Orda.kz  Қазақстандағы АҚШ елшілігінің баспасөз қызметіне сілтеме жасай отырып хабарлайды.

Мал өлімінен зардап шеккен 200-ден астам үй шаруашылығына қаржылай көмек көрсетіледі.

«Көмек мөлшері үй шаруашылығының әрбір мүшесі үшін ең төменгі күнкөріс деңгейіне қарай есептеледі және үй шаруашылығына 170 000 теңгеден аспайтын болады», — делінген хабарламада.

Ақша алушылардың банктік шоттарына аударылады.

2021 жылдың жазында Қазақстанның батысында қатты құрғақшылық болды. Аштықтан қырылып қалған малдардың бейнежазбалары мен суреттері жұртшылықты дүрліктірді. Қазақстандықтар зардап шеккендерге көмек көрсету үшін 43 миллион теңгеден астам қаражат жинады.