АҚШ пен Талибан қозғалысының өкілдері ортақ келісімге келді

«Талибан» лаңкестік қозғалысының өкілдері (Жоғарғы Соттың шешімі бойынша Қазақстанда бұл қозғалысқа тыйым салынған) АҚШ делегациясымен Ауғанстанға гуманитарлық көмек жеткізуге келісті.

Бұл туралы Orda.kz Reuters агенттігіне сілтеме жасап хабарлайды.

Агенттіктің мәліметінше, тәліптер Катарда американдық делегациямен екі күндік келіссөздер жүргізген. Мемлекеттік департаменттің өкілі Нед Прайс екі жақтың да «АҚШ-тың ауған халқына белсенді гуманитарлық көмек көрсетуді» талқылағанын айтты. 

– АҚШ ауғандарға гуманитарлық көмек көрсетеді, - делінген хабарламада.

Сонымен қатар, тәліптер Ауғанстан алатын көмек «саяси мәселелермен байланысты болмауы керек» деп баса айтты. Ауғанстан Сыртқы істер министрінің міндетін атқарушы тәліптер американдық тараптан Ауғанстанның орталық банкінің резервтеріне салынған тыйымды алып тастауды сұрағанын айтты.