АҚШ консулдығы Қытай билігіне наразыларды қабылдады

Қытай билігіне наразы топ біраздан бері туыстарының заңсыз қамалғандығын айтып, әділдік сұрауын жалғастыруда.

Олар 12 наурызда АҚШ-тың Алматыдағы бас консулдығына барды. АҚШ дипломатиялық өкілдігі карантин тәртібімен байланысты 7 адамды қабылдаған.

БАҚ өкілдері жіберлмеген кездесу екі сағатқа созылды. Оған қатысқан адамдар бар мәселені АҚШ елшілігі өкілдерінеайтқандарын жеткізді. Қытай абақтыларында туыстарының заңсыз қамауда ұсталып отырғанын, олардың босатылуын талап етушілер бұған дейін Қытай консулдығы алдына барып наразылық білдіргені үшін әкімшілік жазаға да тартылған. Солардың бірі Байболат Күнболатұлы АҚШ консулдығының қызметкерлері арызданушылардың шағымын мұқият тыңдап,қолдан келгенше көмектесуге уәде еткенін айтты.

АҚШ-тың Алматыдағы консулдығы Twitter-де ол туралы жазды.

— Бүгін біз туыстары Шыңжаңда ұсталып не хабарсыз кеткен қазақ отбасыларымен кездестік. Олардың басынан өткен жайттар қудалау үрейінсіз айтылуы керек, ал отбасылар бір-бірімен қайта табысуы тиіс, делінген жазбада.

АҚШ бұған дейін де «Шыңжаңдағы мұсылмандарды қудалауға қатысы бар» қытай шенеуніктері мен компанияларына санкция салған.

Наразы топ бқл акцияны  33 күннен бері күн сайын өткізіп келе жатыр. Олар АҚШ консулдығынан шыққан соң  Қытай консулдығы алдына тағы барды.Қытай консулдығы ол бұл жолы да оларға есігін ашпады.