АҚШ Бейжің Олимпиадасына дипломатиялық бойкот жариялауды жоспарлап отыр

Вашингтон 2022 жылдың ақпан айында өтетін Бейжіңдегі қысқы Олимпиада ойындарына дипломатиялық бойкот жариялауды жоспарлап отыр.

rg.ru сайтының хабарлауынша, егер АҚШ президенті Джозеф Байден Вашингтон бірнеше рет мәлімдегендей Қытайдағы адам құқықтарының бұзылуына жауап ретінде мұндай шешімді мақұлдаса, Америка билігі өкілдерінің ешқайсысы Олимпиадаға бармайды. Байден қараша айының соңына дейін бойкот жариялау не жарияламау туралы шешім қабылдауы керек.

Бұған дейін Қытай төрағасы Си Цзиньпиннің Байденді Олимпиадаға шақыруы мүмкін екені белгілі болған еді. Алайда 15 қарашада (Мәскеу уақытымен 16 қарашада түнде) өткен екі ел басшыларының онлайн келіссөздерінде Олимпиада тақырыбы сөз болған жоқ.

Осы көктемде АҚШ Конгресі Өкілдер палатасының спикері Нэнси Пелоси Бейжіңдегі қысқы Олимпиада ойындарына бойкот жариялауға шақырған.