АҚШ бастаған бес мемлекет жаңа альянс құрды

Тынық мұхитындағы «тиімді ынтымақтастықты дамытуға және аймақтың аралдық мемлекеттерге қолдау көрсетуге бағытталған» жаңа альянс туралы Ақ үй хабарлады.

Partners in the Blue Pacific (PBP) – бұл АҚШ, Австралия, Ұлыбритания, Жаңа Зеландия және Жапония арасындағы жаңа маңызды серіктестік.

«Біздің бес ел Тынық мұхиты басымдықтарын  тиімдірек қолдау үшін Partners in the Blue Pacific атты кешенді бейресми механизмді іске қосты. Бұл жаңа бастама біздің аймаққа деген ұзақ мерзімді міндеттемемізге, Тынық мұхиты аралындағы елдермен тығыз байланыс пен ұзақ мерзімді серіктестікке негізделеді. Біз егемендік, ашықтық, есеп беру қағидаттарына сәйкес және Тынық мұхиты мемлекеттерінің  басшылығымен аймақты қолдауға бел будық»  делінген хабарламада.

Ұйым Тынық мұхиты аймағының басымдықтарын қолдау және оған мүше елдер мен басқа мемлекеттер арасындағы ынтымақтастықты дамыту мәселесін шешеді деп болжануда.

Алдағы серіктестік көшбасшыларының саммитінде альянс стратегиясының қабылдануы күтілуде. Тынық мұхиты аралдары форумы 2050 жылға дейінгі жоспарды әзірлеуді, сондай-ақ бар жобаларды картаға түсіруді және болашақ бастамаларды жоспарлауды қолға алмақшы.

Ақ үйдің веб-сайты жаңа альянстың «инклюзивті, бейресми және ынтымақтастыққа ашық» серіктестік екенін, оның күш-жігері климаттық дағдарыспен күресуге, қауіпсіздікті қамтамасыз етуге, көлік желілерін дамытуға, аймақтағы денсаулық сақтау мен білім беруге бағытталатынын жазды.