АҚШ Ауғанстаннан шығарылған әскерін Қырғызстанға жіберуге ниетті

АҚШ Бішкекке Ауғанстаннан Қырғызстанға американдық әскерді көшіру мәселесі бойынша жүгінді, бірақ әзірше мұндай форматтағы ынтымақтастық туралы мәселе жоқ.

Бұл туралы Orda.kz хабарлады.

АҚШ-тың мұндай өтініші туралы Қырғызстанның Сыртқы істер министрлігінің басшысы Руслан Қазақбаев РИА Новостиге берген сұхбатында айтты.

Министрдің айтуынша, Қырғызстанның Вашингтонмен терроризмге қарсы іс-қимыл тәжірибесі жеткілікті. Ол ел халықаралық коалиция күштерін Манас әуежайының әуе базасында, Транзиттік орталықта қабылдағанын еске салды.

– Әрине, әр түрлі өтініштер, түрлі деңгейдегі кеңестер болды. Бірақ Ауғанстандағы жағдай күн сайын өзгеруде, қазіргі уақытта мұндай форматтағы ынтымақтастық туралы мәселе жоқ, - деді Қырғызстан СІМ басшысы.

Мамыр айында Wall Street Journal дереккөздерге сілтеме жасай отырып, Америка Құрама Штаттары Ауғанстаннан шығарып жатқан әскерін Орталық Азияға орналастыруы мүмкін деп хабарлады. Бірақ әлі ешқандай келісім жасалмаған. Басылым Америка Құрама Штаттарына әскери қызметкерлерді ғана емес, ұшқышсыз ұшақтарды, бомбалаушылар мен артиллерияны орналастыруға арналған базаларға мұқтаж екенін атап өтті. Кейбір әскери қызметкерлер мен АҚШ президенті Джо Байден әкімшілігінің өкілдерінің пікірінше, Ауғанстанмен шекаралас Өзбекстан мен Тәжікстанға әскер енгізген дұрыс.

Еске салсақ, 15 тамызда Талибандар (Қазақстанда тыйым салынған қозғалыс) Ауғанстан астанасы Кабулға кіріп, президент сарайын басып алған болатын. Олар іс жүзінде Ауғанстан Ислам Әмірлігінің құрылғанын жариялаған. Сол күні Ауғанстан президенті Ашраф Ғани елден кеткен.

Сондай-ақ, Талибан қозғалысының өкілі Сухейл Шахин АҚШ әскерін 31 тамызға дейін шығару керек деп, «шекті уақытты» айтқан.