Берік Уәли президенттің швейцариялық банктегі есепшотына қатысты пікір білдірді

Президент Қасым-Жомарт Тоқаевқа ақпараттық шабуыл жасалып жатыр, деп жазды мемлекет басшысының баспасөз хатшысы Берік Уәли өз парақшасында.

Берік Уәлидің жазбасына Credit Suisse Secrets жобасының зерттеуі себеп болған.

«Кейбір бұқаралық ақпарат құралдары жазып жатқандай Мемлекет басшысы Қасым-Жомарт Тоқаевтың швейцариялық банкте қаржылық шоты жоқ. Сондай-ақ Президенттің шетелдік банктер мен офшорлық компанияларға да ешқандай қатысы болмаған және шетелде жылжымайтын мүлкі де жоқ» делінген Берік Уәлидің Facebook парақшасындағы жазбада.

Ол сондай-ақ Тоқаевтың бұрынғы әйелі басылымда көрсетілген шоттарға ешқашан иелік етпегенін, президенттің ұлы Тимур Тоқаевтың кәсіпкерлікпен айналысатынын және ешқашан мемлекеттік қызметте жұмыс істемегенін айтты.

«Қасым-Жомарт Кемелұлының бұрынғы жұбайының да мақалада жазылғандай ешқашан қаржылық шоты болмаған.

Тимур Тоқаевқа келетін болсақ, жасы 38-де. Ол – кәсіпкер, ешқашан мемлекеттік қызметте істемеген» деп қосты Уали.

Сонымен қатар, президент хатшысы Қасым-Жомарт Тоқаевқа ақпараттық шабуыл жасалып жатқаны туралы айтты.

«Өздеріңіз білесіздер президент экономика мен саясаттағы монополияны шектеуге, реформаларды жүзеге асыруға күш салып келеді.  Бұл Мемлекет басшысының осындай шешімдерін жақтамайтын адамдардың әдейі таратып жатқан фейк ақпараттық шабуылы деп ойлаймын» деп түйіндеді Берік Уәли.

Credit Suisse Secrets жобасының зерттеуі Тоқаевтар отбасының Женевадағы көл жағасындағы таунхаустардағы пәтерлері, Мәскеудегі пәтерлері, Швейцария банкіндегі шоты және офшорға апаратын ақша ізі бар екенін көрсетті.