Ақорда ғимараты қаптамасының тасы қайда?

Ақорда ғимараты сыртқы қаптамасының бір бөлшегі шатырды жоспарлы жөндеу кезінде уақытша алынды.

Бұл туралы Orda.kz хабарлады.

Әлеуметтік желілерде Ақорда ғимаратының сыртқы қабырғасындағы алынған элемент жетіспей тұрған сурет тарады. Қазақстандықтар түсініктемелерде болған оқиға сапасыз жөндеу жұмыстарының нәтижесі деген пікір білдірді.

Президент істері басқармасының ақпараты бойынша, осы жазда «Ақорда» резиденциясының ғимаратында шатырды жоспарлы жөндеу жүргізілуде. Жұмыс мамыр айында басталып, қыркүйекте аяқталады.

Тарихи ғимарат бүкіл жазда эстетикалық көрінісін жоғалтпауы үшін үнемді технологияны қолдануға шешім қабылданды.

«Жағалау жағындағы қабырғада құрылыс тетігін кедергісіз көтеру үшін карниздің фрагменті бөлшектелді. Осы құрылғының көмегімен жұмысшылар қажетті материалдарды жоғарыға көтереді», - делінген хабарламада.

Сәндік элемент қазір қоймада сақталуда, шатыр жұмыстарын аяқталғаннан кейін ол орнына қайтарылады.

Ақорда резиденциясы осыдан 17 жыл бұрын салынған. Оның ресми ашылуы 2004 жылғы 24 желтоқсанда болған. Бірегей ғимараттың шатырын жөндеу алғаш рет жүргізілуде.