Ақмолада дауыл соғып, үйлердің шатыры ұшып кеткен

Құйын желдің салдарынан Степногор қаласындағы Изобильное ауылының 147 үйі жарықсыз қалды.

Бұл туралы Orda.kz хабарлады.

25 шілде Степногор қаласындағы Изобильное ауылында сағат 18:15 шамасында дауылды жел соққан. Салдарынан электр бағаналары мен ағаштар қирап, бірнеше үй шатырсыз қалған.

– Оқиға орнына келгенде елді мекенде 25-30 м/с жылдамдықпен соққан желдің салдарынан 17 электр бағанасының бүлінгені, бір үйдің шатыры толығымен, ал 29 тұрғын үйдің шатыры ішінара ұшып кеткені анықталды. Сондай-ақ ауыл клубы ғимаратындағы 20 шаршы метр аумақтың шатыры бүлінген. Сонымен қатар, дауыл жылу қазандығы ғимаратындағы 100 шаршы метр аумақтың шатырын ұшырып әкеткен. Зардап шеккендер жоқ, - деді Ақмола облысы ТЖД баспасөз қызметі.

Оқиға орнында «Көкше-энерго» ЖШС жұмыс істеп жатыр.

Кейін белгілі болғандай, Бестөбе кентінде де үш тұрғын үйдің шатыры зақымдалған.

– Степногор қаласының әкімдігі елді мекендерге келген шығынды бағалау үшін, табиғи апаттың салдарын жою комиссияcын құрды, - деді облыстық ТЖД бастығының орынбасары Қанат Доспаев.