Ақмола облысында жоғалған сарбаз табылды

Ақмола облысының Ақкөл қаласында 55209 әскери бөлімінде жоғалған сарбаз бойынша қорғаныс министрлігі ресми мәлімдеме жасады.

Сарбаз қарулы күштер қатарына 2021 жылдың қараша айында шақырылған.

«Ақмола гарнизонының 55209 әскери бөлімінде мерзімді әскери борышын өтеп жүрген қатардағы жауынгер А. 2021 жылдың 12 қарашасында кешкі түгендеу кезінде болмаған. Әскери бөлім командирі жоғалған сарбазды іздеуге қажетті шараларды қабылдады. Әскери қызметші тәулік ішінде табылды. Дені сау, аман» делінген министрлік хабарламасында.

Аталған факті бойынша әскери полиция органдары тергеу жүргізуде.

Еске салсақ, 12 қарашада 55209 әскери бөлімі кезекшісінің көмекшісі сарбаздың жоғалғаны туралы полицияға хабарлаған. Сарбаз Түркістан облысынан мерзімді әскери қызметін өтеу үшін 2021 жылғы 4 қарашада Ақкөл әскери бөліміне келген. Бөлім командирінің орынбасарлары сарбаздың жоғалғаны туралы ақпаратты жоққа шығарған болатын.

Сонымен қатар, әскери бөлімнің жеке құрамынан іздеу топтары құрылды. Аудандық полиция пункттерінің автопатрульдері, ауылдық округтердің учаскелік полиция инспекторлары іздеу шараларына жұмылдырылған.