Ақмола облысында жоғалған бала көліктің жүксалғышынан табылды

Ақмола облысында полиция қызметкерлері жоғалған баланы көліктің жүксалғышынан тапты.

Бұл туралы Orda.kz хабарлайды.

30 қыркүйекте ер адам полициядан 2009 жылы туған ұлын табуға көмек сұрады. Ер адамның айтуынша, 29 қыркүйек күні сағат 20.00 шамасында бала үйден шығып кеткен, кейін қайтып оралмаған.

Баланы іздеуге дереу тергеу-жедел тобы жіберілді. Полиция қызметкерлері арыз берушілердің тұрғылықты жеріне келгеннен кейін, ең алдымен жақын маңдағы аумақты және баланың әкесінің жүрмей тұрған көлігі орналасқан ауланы қарады.

– Полиция автокөлікті тексеруге шешім қабылдап, жүксалғышты ашқанда әкесінің жейдесін киіп, ұйықтап жатқан бала табылды, - деп хабарлады Ақмола облысының полиция департаменті.

Баланы тексергенде оның өмірі мен денсаулығына қауіп төндіретін белгілер болған жоқ, бала ата-анасына тапсырылды.