Ақмола облысындағы бақылау-өткізу бекеттерінде көліктер жиналып қалды

Ақмола облысының Аршалы ауданында жолдың жабылуына байланысты көліктер тұрып қалды. Қарағандыдан шығатын жолда да жағдай солай.

Елордадан шыққанда 100-ден астам автокөлік жолда тұрып қалды.

Құтқарушылар мен полицейлер жолаушылар мен жүргізушілерге төтенше жағдайларды болдырмау үшін елді мекенге оралу қажеттігі туралы түсіндіру жұмыстарын жүргізуде.

«ҚазАвтоЖол» АҚ хабарлауынша, жолды тазалау жалғасуда, жұмысқа  боран мен қатты жел кедергі келтіруде.

Сонымен қатар, Қарағандыдан  Нұр-Сұлтан бағытына шыға берісте 230-дан астам көлік жинақталған. Колоннадағы көліктерді алып жүру мәселесі шешілуде.

Ақмола облысы Төтенше жағдайлар департаментінің қызметкерлері өңір тұрғындарын елді мекендерден тыс жерлерге шықпауды сұрайды. Жолдардың жабылуы туралы «Дәрмен» қолданбасы немесе 1403 телефоны арқылы білуге ​​болады.