Ақмола облысында пәтерде газ балоны жарылып, 3 адам қаза тапты

Төтенше жағдайлар министрлігінің ресми өкілі Талғат Уәли 16 қараша күні Ақмола облысы Шортанды ауылының Линейная көшесінде газ балоны жарылғанын хабарлады.

Полиция қызметкерлерінің кезекші бөлімінен Шортанды кентінің No18 кезекші қызметіне хабарлама сағат 21:38-де түскен. Өртті сөндіруге барлығы 35 қызметкер мен 7 техника және «Жер Ана» ЖШҚ ЖШС-нің 4 қызметкері мен 1 техникасы жұмылдырылды.

Оқиға орнына жеткенде казармалық типтегі пәтерде өрт шыққаны, шатырдың жалынға оранғаны анықталды. Өрт аумағы 350 шаршы метрді құраған.

Өрт 22:35-те оқшауланып, 23:55-те сөндірілді. Оқиға орнынан 3 адамның мәйіті табылды. 10 адам түрлі жарақаттармен облыстық орталық ауруханаға жатқызылды.

Өрт себебін анықтау үшін Ақмола облысының жедел тергеу тобы мен ғылыми-зерттеу зертханасы жұмыс істеуде. ҚР Төтенше жағдайлар министрлігі азаматтарды өрт қауіпсіздігі ережелерін сақтауға шақырады.