Ақмола облысында ер адам жылқы ұрлап, қонақ бөлмесіне жасырып қойған

Ақмола облысында ер адам көршісінің жылқысын ұрлап, қонақ бөлмесіне жасырып қойған. Оның бұл әрекеті ауылдағы ағайындарды бір күлдіріп тастады.

Ер адам жылқыны бір бөлмеге жасырып, өзі жанындағы бөлмеге барып ұйықтап қалған. Түнімен сабылып іздеген ауыл адамдары биені таба алмаған соң, таңертең полиция шақырған. Қызметтік ит құқық қорғау органдары қызметкерлерін жылқы иесінің көршісінің үйіне бастап барған. Жануар сол үйден табылды.

Қырықтың қырқасындағы еркек жылқының үйде жүргенін және аяқ астынан келіп қалған қонақтарды көріп өзі де абдырап қалды. Ол түнімен ішімдік ішкенін, жылқының үйге қалай кіріп кеткенін білмейтінін алға тартқан. Шындығында, жылқы қорасы маңынан табылған аяқ киім іздері оны ұстап берген болатын.

Видео желіде жарияланып, ер адамның әрекетіне жұрт күліп жатыр.

Облыстық полиция департаменті ақпаратына сәйкес, аталған оқиғаға байланысты 188 бап 3 тармақ 1 қосымша бойынша сотқа дейінгі тергеу басталды. Қазіргі уақытта тиісті тергеу шаралары жүріп, күдіктінің жанында сыбайластары бар жоғы анықталып жатыр.

Аталған бапқа сәйкес, күдікті бес жылдан он жылға дейін сотталып, дүниесі тәркіленуі мүмкін.