Ақмола облысында ер адам қызымен сарқырамаға құлап кетті

Куәгерлердің айтуынша, сарқырама тамашалауға келген әкесі мен қызы суретке түспек болғанда, суға құлап кеткен. Әкелерінің жылдамдығы арқасынды отбасы аман қалды.

Желіде сарқырама маңында қатты ағысты өзенде қызын құшақтаған  ер адамның ағып бара жатқаны түсірілген бейнежазба  тарады. Оқиға Ақмола облысында болған.

Бейнежазбадан жанталаса қарманған ер адамның қолының тасқа ілінгенін көруге болады. Баласын  кеудесіне қыса ұстаған әке тасқа жармасқанда басқалары көмекке келген сияқты.

Айналадағы адамдар жанұшыра айқайлап жатыр. Болжам бойынша, бұл Ақмола облысы Зеренді ауданындағы сарқырама.

— Әкесі қызымен бірге сарқырама алдында суретке түспек болған. Анасы мен айналадағы адамдар оны райынан қайтаруға тырысты, бірақ еш нәтиже шықпады. Қыз тастан құлап кетті, әкесі артынан секірді. Екеуі де судан шығарылды, - деп мәлімдеді куәгерлер.

Зеренді ауданының әкімдігі хабарлағандай, 16.35-те аудандық ауруханаға Көкшетауда тұратын 2015 жылғы бала түсті. Оның алған жарақаты ауыр емес.  Дәрігерлер медициналық көмек көрсеткеннен кейін, олар  үйлеріне жіберілді.