Ақбұлақтық атқыштың Донбастағы суреті жарияланды

Алматы қаласы Алатау ауданы Ақбұлақ шағынауданында бес адамды атып тастаған Игорь Дужновтың Донбаста соғысқаны расталды. Ақпаратты ресейлік арнайы қызмет «Чиновник» телеграм арнасымен бөліскен.

Бұл туралы Orda.kz хабарлайды.

Игорь Дужновтың бір кездері іс-түссіз екі жылға жуық уақыт жоғалып кетіп, кейін қайтып келгені туралы БАҚ бетінде ақпарат тараған.

«Ресейлік арнайы қызметтер Игорь Дужновтың (алматылық атқыш) Украинаның Донецк облысы аумағындағы қарулы қақтығысқа қатысқаны туралы ақпаратпен бөлісті. Дужнов Украинаның шығысындағы соғыс аймағына жіберу үшін еріктілерді жалдаумен айналысатын «Суть Времени» тәуелсіз құрылымының құрамында болған. Осы құрамның барлаушы тобында қызмет еткен» делінген телеграм арнадағы хабарламада.

20 қыркүйек күні кешкі сағат 17:00-де Ақбұлақта атыс болған. Бес адамды бірдей жер жастандырған күдіктінің есімі Игорь Дужнов. Ол 2011 жылы алған несиесін төлей алмай, кепілдікте тұрған үйінен сот шешімімен босатуы тиіс еді. Сонымен қатар оның Бағанашылда кәсіп жүргізген жылжымайтын мүлкі болған. Кейін үй аукцион арқылы басқа адамға сатылған. Оның жаңа иесі Нұрахмет Тұрғанов екені айтылды. Қолына үкімді ұстап келген екі учаскелік полиция мен сот орындаушы және үйдің жаңа иесі мен куә ретінде келген досы сол жерде қаза тапты.