Ақбұлақтық атқыш Дужновқа тағы бір айып тағылды

Бүгін Алматыда 2021 жылдың 20 қыркүйегінде Алматының Ақбұлақ ықшамауданында бес адамның өліміне қатысты іс бойынша басты сот отырысы басталды.

Игорь Дужнов жеке адамға қарсы, адамзаттың тыныштығы мен қауіпсіздігіне, қоғамдық қауіпсіздік пен қоғамдық тәртіпке, әкімшілік тәртіпке, сот төрелігіне және жазаны орындау тәртібіне қарсы қасақана ауыр және аса ауыр қылмыстар жасады деп айыпталуда.

Тағылған айыптардың мәнін түсіндіру барысында мемлекеттік айыптаушы Дужновқа басқалармен қатар Қазақстан Республикасы азаматының шет мемлекеттің аумағындағы қарулы қақтығысқа не ұрыс қимылдарына қасақана заңсыз қатысқаны үшін айыпталып отырғанын түсіндірді.

Еске салсақ, 2021 жылдың 20 қыркүйегінде Алматының Алатау ауданындағы Ақбұлақ шағын ауданында 54 жастағы Игорь Дужнов сот орындаушыларына оқ жаудырған. Бес адам қайтыс болды. Олардың арасында сот орындаушысы, екі полицей және екі бейбіт тұрғын бар. Белгілі болғандай, бейбіт тұрғындардың бірі үйдің жаңа қожайыны болса, екіншісі оның танысы.

Ер адам 20 жылға дейін не өмір бойына бас бостандығынан айырылуы мүмкін.