Ақбұлақта мерт болған полицей туралы не белгілі?

Ақбұлақ ықшамауданында атыс кезінде мерт болған учаскелік инспектор Нұрбол Байғазиев туралы оның әріптесі Жеңісбек Сыдық еске алды. Оның айтуынша, Ақбұлақ ықшамауданындағы учаске Дархан Сүлеевтің бақылауында болған, ал Нұрбол Байғазиев әріптесіне көмектесу үшін ғана барған. Бұрындары ол осы аумаққа жауапты болған.

Бұл туралы Orda.kz Aibat ақпараттық қызметіне сілтеме жасап хабарлады.

Әріптесі кезекті шақыртудың соңы осылай бітетінінін кім білген дейді.

– Сүлеев Дархан бұл қызметке бір ай бұрын ғана Есірткі бизнесіне қарсы күрес басқармасы бөлімінен келген. Хабар келген кезде учаскелік қызметкерлердің бәрі сол жаққа кетті. Нұрбол бұл аймақпен таныс болғандықтан, көмектесуге барды. Ол ақ жарқын адам еді, - деді Жеңісбек Сыдық.

Жеңісбек Сыдықтың айтуынша, Нұрбол Байғазиев қарапайым жалдамалы пәтерде өмір сүрген. Оның артында кәмелетке толмаған екі баласы қалған. Марқұмның әйелі жақында инсульт алған.

Еске салсақ, 20 қыркүйекте Алматыдағы Ақбұлақ ықшамауданында ер адам оны үйінен шығаруға тырысқан полицейлер мен сот орындаушыларына оқ атты. Бес адам мерт болды: сот орындаушысы, екі учаскелік полиция қызметкері, даулы мүліктің жаңа иесі және сот орындаушысы әкелген тағы бір адам.

Күдікті бейтараптандырылды және арнайы жасақ сарбаздарының қатысуымен қарусыз ұсталды, өйткені үйде әйелдер мен балалар болған.

«Кісі өлтіру» және «Билік өкіліне шабуыл жасау» баптары бойынша екі қылмыстық іс қозғалды. 1967 жылы туған кісі өлтіруге күдікті 20 жылға бас бостандығынан айырылуы мүмкін.

Қаза тапқан полиция қызметкерлерінің отбасылары баспанамен қамтамасыз етіледі.

Сондай-ақ, Алматыдағы Ақбұлақ ықшамауданындағы атысқа күдіктінің әйелі Анаида Демирчян президент Қасым-Жомарт Тоқаевқа жүгінді.