Ақан Сатаевтың бір сценарийінің құны 67 млн тұрады

Ақан Сатаевтың Серік Сәпиев туралы «Боксшы» фильмі бюджеті 800 млн теңгеге шықты. Оның тек 67,5 млн теңгесі сценарийге жұмсалған.

2019 жылдың көктемінде ұлттық киноны қолдау мемлекеттік орталығы алғашқы киножобалар байқауына қатысуға өтінім қабылдады. Нәтижесінде SATAI FILM компаниясының «Боксшы» киножобасы бюджеттік қаржыландыруға ие болды.

Айта кетерлігі, байқау жобалары киноны қолдау мемлекеттік ұлттық орталығында Гүлнәр Сәрсенова төрайым болған уақытта таңдалды. Кейін оны аса ірі көлемде пара алды, орындалған жұмыстардың жалған актілеріне қол қойды деп айыптады.

«Боксшы» фильмінің бастапқы бюджеті 500 млн теңге болды. Бірақ пандемия кезінде компания тағы 300 млн теңге сұрады. Нәтижесінде Серік Сәпиев туралы фильмге мемлекет 800 млн теңге жұмсады.

Satai FILMS пен ұлттық киноның мемлекеттік қолдау орталығы шығындардың толық сметасын көрсету туралы ORDA. редакциясының сұрауына жауап беруден бас тартты. Олар бас тартудың себебі ретінде - продюсерлердің, сценаристердің және басқа да фильмге қатысы бар тұлғалардың жеке гонорарлары туралы ақпарат құпия болуы тиіс екендігін айтты.

Фильм бюджетінің қомақтылығы Лондон, Пекин, Баку, Милан және Мьянмада өткен түсіру жұмыстарына байланысты деп сендірді.

ORDA. редакциясын картинаның құны ғана емес, чемпион туралы толық метражды фильм сценарийіне бөлінген 67,5 млн теңге де қызықтырады.

Біз адам тарихына негізделген толық метражды фильмдердің сценарийлері қанша тұратынын іздестірдік. Ресейлік сценарист осындай материал үшін 4,5 млн теңге сұрады, ал қазақстандық сценарист бар болғаны 2 млн теңге сұрады.

Жыл сайын қазақстандық киноға миллиардтаған қаржы бөлінеді

• «Томирис» (2019) - 3,8 млрд теңге. Кассалық алымдар 600 млн теңгеге жуық;
• «Көшбасшы жолы» (2018) – 2 млрд теңгеден астам. Кассалық алымдар 4 млн теңгеден астам;
• «Ликвидатор» (2011) - 352 млн теңге. Кассалық алымдар 55 млн теңгеден астам.

SATAI FILMS компаниясы фильмнің түсірілімі аяқталғанын хабарлады.

Авторы: Карина Закарина

Аударған: Мұхит Тұрсынәлі