9 жасар Маликаның ісі алға жылжыды

Алматы облысы Абай ауылының тұрғыны Үрзия Құрбаниязованың 9 жасар қызы Маликаға қатысты іс алға жылжыды.

Бұл туралы Orda.kz тілшісі хабарлады.

Тұрғын үйлер аумағында салынып жатқан төрт қабатты жатақхананың кәріз құдығына құлап кетіп, мүгедек болып қалған 9 жасар Малика туралы Orda.kz тілшісі зерттеу жүргізген болатын.

Нәтижесінде Маликаға қатысты материал жарыққа шыққан соң іс алға жылжыды. Қазіргі таңда тергеу аяқталып, іс сотқа жіберілді. Күдікті деп танылған құрылысқа жауапты құрылысшы сот шешімімен үйқамаққа алынды. Ал 2 жыл бойы бизнесін гүлдендіріп Маликаның еміне не көмек бермеген, не анасымен адамша сөйлеспеген, тек қорқытып-үркітумен айналысқан жатақхана иесі Анар Тындыбекова істе тек куәгер ретінде танылған екен. Қорғаушы Инга Иманбай жатақхана иесі де құрылысқа жауапты адаммен бірдей істі болуы керек екендігін айтқан болатын.

«Менің қорғауымдағы үлкендердің салғырттығынан 1 топтағы мүгедек болып қалған Маликаның ісі алға жылжи бастады. Тергеу 2 жыл бойы тоқтап, күдіктілер бостандықта жүрді. Бір ай бұрын істі мен заңгер ретінде қолға алып, тергеу барысымен таныстым. Баспасөз мәжілісін жасап, қоғам назарын аударғалы біраз жұмыс атқарылды. Бұл үлкен резонанс Бала құқығы жөніндегі Уәкіл Динара Зәкиеваға да жетті. Енді осы жасалған еңбек зая кетпей, жауаптылар тиісті жазасын алады деп үміттенеміз», — деді қорғаушы.      

Сонымен қатар, Инга Иманбай Маликаның еміне қатысты материалдық және моральдық шығынды өтеу үшін азаматтық іс қозғайтындығын айтты. 

Бала құқығы жөніндегі уәкіл Динара Зәкиева әлеуметтік желіде істі өз бақылауына алғанын жазды.

«Қазіргі таңда, бұл іс бойынша ІІМ-мен және прокуратурамен бірлесіп жумыс істеп жатырмыз. Өтініш жолдадық. Алматы облысының полиция департаментімен,қорғаушы Инга Иманбаймен байланыстамыз. Істі егжей-тегжейілі талқыладық. Әрине, әділдікке қол жеткізуіміз керек. Сот әділ шешім шығарады деп ойлаймын. Сонымен қатар, қорғаушымен Маликаның ары қарайғы ем-шарасы мен операция мәселесімен де айналысамыз деп келістік»,— деді балалар омбудсмені.

Істің алдағы уақытта қалай өрбитіні Orda.kz назарында болады.