«88 науқасты зорлаған»: Норвегияда азғын дәрігерге қатысты сот отырысы басталды

Норвегияда 55 жастағы дәрігерге қатысты сот отырысы басталды. Арне Бай сексуалды зорлық-зомбылық жасағаны үшін айыпталып жатыр. Ол бұл әрекеттерін жиырма жылдан астам уақыт бойы жасаған деп хабарлайды Orda.Kz VG сайтына сілтеме жасап.

Норвегияның 2600 тұрғыны бар кішкентай Фроста ауылында үлкен дау шықты. Жергілікті дәрігер Арне Байды науқастарына зорлық жасаған деп айыпталып отыр.

Іс материалдарына қарасақ, Бай 2004 жылдан 2022 жылға дейін бейнемазмұнды құпия түрде түсіріп келген. Бұл уақыт аралығында ол алты мың сағат гинекологиялық тексерулерді және сексуалды қорлық пен зорлық эпизодтарын түсірген.

Тергеушілердің айтуынша, Бай медициналық процедураларға қатысы жоқ әрекеттер жасаған. Айыптау құжатында оның әйелдердің интимдік аймақтарына саусақтары мен заттарды тығып, оларды ұстап, зорлық көрсеткені туралы айтылады.

Барлық әрекеттер әйелдердің келісімінсіз және олардың қорғансыз күйінде жасалған.

Арне Бай 20 жылдан астам уақыт бойы дәрігер болып жұмыс істеп, сенімге ие болған. 2020 жылы ол COVID-19 пандемиясымен күреске қосқан үлесі үшін марапатталған.

Бұл оқиға бүкіл ауылды дүр сілкіндірді.

Ал Арне Бай айыптауларды жоққа шығарып, бейнемазмұнның оның кәсіби этикасын дәлелдейтінін мәлімдеді.