«Керуен-сарай» кешеніне жоспарлы жөндеу жұмыстары жүргізілуде

Түркістанда «Керуен-сарай» кешеніне жоспарлы жөндеу жұмыстары жүргізілуде.

Бұл туралы Orda.kz хабарлайды.

Түркістан облысы әкімінің орынбасары Сәкен Қалқаманов бұл мәлімет туралы өз facebook парақшасында жариялады.

Әлеуметтік желіде кешеннің қабырғалары құлап жатқаны туралы тараған видеоға әкім орынбасары «жоспарлы жөндеу» деп жауап берді.

– Нысан басшылығының өтініші бойынша келушілердің қауіпсіздігін сақтай отырып, жоспарлы жөндеу жұмыстары жүргізілуде. Әлеуметтік желі пайдаланушыларынан анық емес ақпаратты таратпауды сұраймын. Нысан жеке инвестициялар есебінен салынғанын еске салайын. Құрылыстың сапасына инвестор жауапты, – деп атап өтті аймақ басшысының орынбасары.

Еске сала кетейік Қазақстан даму банкі жобаның құны 87 млрд теңге болғанын хабарлаған. «Turkistan Silk Way Harbor» ЖШС - 47 млрд теңге салды (жобаның жалпы құнының 54%). ҚДБ қатысуы - 40 млрд теңге, оның ішінде 30 млрд теңге - бұл банктің жергілікті нарықта нарықтық мөлшерлемелер бойынша тартқан қаражаты, қалған 10 млрд теңге - бюджеттік кредит.

87 млрд теңгеге салынған кешеннің бұдан өзге де тұстары жамалып, қайта өңделіп жатыр. Қабырғалары қирап жатқан суреттер де желіде тараған болатын. Айта кетейік, кешеннің ашылуы 2021 жылдың 10 сәуірінде болды.