«80-90% емделіп кетуі мүмкін»: Ербаянның әкесі мәлімдеме жасады

Ұлттық гвардия сарбазы Ербаян Мұхтардың әкесі ұлының денсаулығына алаңдап, оның суреттері мен бейнематериалдарын жариялауға тыйым салды. Бұл туралы ол Астанада өткен брифингте журналистерге мәлімдеді, деп хабарлайды Orda.kz.

Ербаянның әкесі Хамит Аймағамбетов ұлының сауығу жолында ауыр кезеңді басынан өткеріп жатқанын, дегенмен сауығу белгілері байқалатынын атап өтті.

«Соңғы уақытта оның денесі құрысып қалып жүр, бірақ дәрігерлер мұндай жарақаттарда бұл қалыпты құбылыс екенін айтты. Ең бастысы – уақтылы ем қабылдау болып тұр», – деді Аймағамбетов.

Сарбаздың отбасы емін шетелде, Германияда жалғастыруды жоспарлап отыр. Оған ол жақтан үміттенерлік болжам айтыпты.

«Неміс дәрігерлері Ербаянның толықтай сауығып кету мүмкіндігі 80-90% деп отыр. Біз оның қайтадан аяққа тұратынына сенеміз», – деді Хамит Аймағамбетов. 

Дегенмен әкесі ұлы толықтай сауығып кеткенге дейін оның фотосуреттері мен бейнематериалдарын жариялауға үзілді-кесілді қарсы екенін, мұны көз тиюден сақтаудың амалы деп түсіндірді.

«Германиядан оралған соң, мен бәрін өзім айтып, халыққа көрсетемін», – деп түйіндеді Аймағамбетов

Естеріңізге сала кетейік, Orda.kz былтыр желтоқсан айында әскери қызметте ауыр бас жарақатын алып, жарты жыл бойы комада жатқан сарбаздың жақындарынан сұхбат алған болатын.