8 наурызда әйелдер митингісін талап еткен журналист пикетке шықты

Алматыда журналист Айсұлу Тойшыбек әйелдер маршы мен 8 наурызда өтетін митингіні қолдау мақсатымен пикетке шықты, деп хабарлайды Orda.kz порталы.

Журналист «Панфилов» көшесінде, «Жібек жолы» метро станциясының жанындағы жаяу өткел тұсында бір сағат пикет өткізіп, қолына «Әйелдер нені қалайды? Әйелдер маршты қалайды. Марш болсын» деген жазуы бар плакат ұстаған. Ол пикетке шығатыны туралы eOtinish порталы арқылы жергілікті билікке хабарлағанын айтқан.

Пикетте Айсұлудың Алматы әкімі Ерболат Досаевқа үндеу тастап, белсенділердің митингі мен марш өткізуіне рұқсат беруді сұрағаны көрінеді.

Әйелдер құқығын қорғаумен шұғылданатын әртүрлі топтар 8 наурыз - әйелдердің халықаралық мерекесі күні «Қазақстан әйелдерінің қауіпсіздігі мен еркіндігі» деген тақырыпта әйелдер митингісі мен маршын өткізуді жақтап келеді. Фем-белсенділер Алматы әкімдігіне бірнеше рет хабар берген. Алайда әлі күнге келісім ала алмаған.

2020 жылы қабылданған «Бейбіт жиын туралы» заңды Астана «прогрессивті және демократиялы» заң деп атайды. Бұл заң бойынша қандай да бір бейбіт жиынға шығатын адам ол жөнінде әкімдікке хабар берсе жеткілікті. Бірақ шын мәнінде жергілікті биліктің келісімін алуға тиіс.