78 адамның өмірін жалмаған өрт: 19 адам қамауға алынды

Түркиядағы тау шаңғысы курортында болған өрттен 78 адамның қаза табуына байланысты жүргізілген тергеу аяқталды.  Күдікті ретінде 19 адам қамауға алынды, деп хабарлайды Orda.kz. 

Тергеу сараптамасының нәтижесіне сәйкес, қайтыс болған 78 адамның 38-і кәмелетке толмаған балалар екені анықталды. Өрт кезінде көз жұмғандардың басым көпшілігі түтінге тұншығып өлген. 

2025 жылдың 25 қаңтарында Түркия президенті Режеп Тайып Ердоған елдің сот жүйесі бұл оқиғаның барлық қыр-сырын анықтау үшін бар күшін салып жатқанын мәлімдеді. Күдіктілер арасында Болу муниципалитеті мэрінің орынбасары Седат Гүленер және өрт сөндіру басқармасы басшысының орынбасары Кенан Жошкун бар.

Тергеу барысында қонақ үйде өрт кезінде автоматты түрде су шашатын жүйенің болмағаны да анықталған. Бұдан бөлек өрт кезінде далаға шығуға арналған апаттық баспалдақтардың есіктері жабық тұрған. 

Еске салайық, 20 қаңтардан 21 қаңтарға қараған түні Болу қаласындағы Карталкай тау шаңғысы курортындағы Grand Kartal қонақ үйінде өрт шықты. Өрт салдарынан 78 адам қаза тапты. Мерт болғандар арасында бір әулеттің 14 адамы да бар.