75 мәдениет қызметкері Тұңғыш Президент стипендиясына ие болды

Мемлекеттік хатшы Қырымбек Көшербаев Қазақстанның халық әртісі, мемлекеттік сыйлықтың лауреаты, Әуезов атындағы Қазақ мемлекеттік академиялық драма театрының актері Сәбит Оразбаевқа І дәрежелі «Барыс» орденін салтанатты түрде табыс етті, деп хабарлайды Ақорда сайты.

Ұлттық мәдениет пен театр өнерін дамытудағы ерекше қызметі, жемісті еңбегі үшін актерге сыйлық берілді. Мемлекеттік хатшы салтанатты түрде Сәбит Оразбаевты 85 жасқа толуымен құттықтап, оған Қазақстанның Тұңғыш Президенті - Елбасы Нұрсұлтан Назарбаев пен Мемлекет басшысы Қасым-Жомарт Тоқаевтың құттықтауын оқып берді.

Сондай-ақ, Мемлекеттік хатшы танымал қазақстандық каскадер, «Nomad Stunts» каскадерлер тобының жетекшісі Жайдарбек Күнғожиновпен кездесіп, оны Бүкіләлемдік каскадёрлер академиясының (АҚШ) «Таурус» сыйлығымен марапатталуымен құттықтады.

Сонымен қатар, Тұңғыш Президент - Елбасы стипендиясы қазақ әдебиеті мен өнерінің шеберлері Әбдіжәміл Нұрпейісов, Асанәлі Әшімов, Нұрғали Нүсіпжанов, Александр Гаркавец, Дулат Исабеков, Иранбек Оразбаев, Болат Аюханов, Гүлвира Разиеваға берілді.

Ақын Бауыржан Халиолла мен Мирас Асанға, балерина Әсел Жанғасқаеваға, актер Аян Өтепбергенге, өнертанушы Валерия Недлина сияқты жас таланттарға мемлекеттік қолдау көрсетілді.