700 балаға қауіп төніп тұр: Ақтөбеде туберкулездің ашық түрімен ауыратын медбике балалармен жұмыс істеген

Ақтөбе көпбейінді облыстық балалар ауруханасының 21 жастағы медбикесі 2023 жылдың желтоқсанынан 2024 жылдың қыркүйегіне дейін реанимация бөлімшесінде жұмыс істеген, деп хабарлайды Orda.kz.

Медбике 2023 жылдың мамырында ауыра бастаған, ал қыркүйек айында одан туберкулездің ашық түрі анықталған.  

«Бастапқыда ол жіті респираторлық вирустық инфекциясымен (ЖРВИ) ауырған, кейін екі рет пневмония болды. Жалпы ол үш рет ауруханаға жатты. Жұмысқа қабылданған кезде денсаулығында ешқандай мәселе болмаған, ал реанимация бөлімшесінде қызметке қабылдау тәртібі өте қатаң», – деп хабарлады облыстық денсаулық сақтау басқармасының баспасөз қызметі.  

Қазіргі уақытта медбике қажетті ем алуда. Ал онымен байланыста болған 55 әріптесі диаскин-тест пен флюорографиядан өткен – олардың арасында ауру анықталмады.  

Сондай-ақ, медбикемен байланыста болған 700-ден астам баланы тексеру басталды.