7 жастағы қызды мерт қылған көлік жүргізушісі 5 жылға сотталуы мүмкін

Алматы қаласында 2 наурыз күні 7 жастағы қызды абайсызда басып кеткен жүк көлігінің жүргізушісі 5 жылға бас бостандығынан айырылуы мүмкін, деп хабарлайды Orda.kz.

Оқиға Алатау ауданында болды. Бейнебақылауда марқұм Айзере Ибраева қосымша сабағынан қайтып келе жатып, жолдың екінші жақ шетінде күтіп тұрған анасына бара жатқаны көрінеді. Боралдай көшесінен Renault жүк көлігін тізгіндеген жүргізуші абайсызда жаяу жүргінші жолынан өтіп бара жатқан 7 жастағы қыздың үстінен басып өтеді. Оқушы қыз оқиға орнында көз жұмады.

«Автобус жүргізушісін міндетті түрде ұстаңыздар! Ол балаға жолдан өтуге кедергі келтірген соң, қыз фураның жанында тұрып қалды. Соның кесірінен, жүк көлігінің жүргізушісі оны көрмей, басып кетті», – деді қыздың туысқаны.

Полиция қызметкерлері 66 жастағы жүк көлік жүргізушісін ұстады. Ол «Абайсызда адам өліміне әкеп соқтырған жол ережесін бұзу» фактісі бойынша 5 жылға бас бостандығынан айырылуы мүмкін. Ал автобус жүргізушісіне әлі ешқандай айып тағылмады.

Оқиға болған жерде тұратын тұрғындар бұндай жағдайдың бірінші рет болып тұрмағанын айтты. Бұған дейін де балалар мен ересектерді көлік қаққанын және тұрғындар жоғары жаққа бағдаршам мен жарықтандыруды жақсарту керек екенін айтып шырылдаған. Алайда оларға сол күйі ешкім жауап бермеген. Енді тұрғындар жер асты өткелін салуды талап етіп отыр.