7-20-25 және Баспана Хит борышкерлерінің төлем уақыты үш айға шегерілді

«7-20-25» және «Баспана Хит» ипотекалық бағдарламалары бойынша қарыз алушыларға 90 күнге дейін жеңілдікті кезең берілді, деп хабарлады Қазақстанның тұрақтылық қоры.

ҚР Қаржы нарығын реттеу және дамыту агенттігінің 2022 жылғы 10 қаңтардағы бұйрығымен Төтенше жағдай әсерінен зардап шеккен жеке және заңды тұлғаларға кредиттер бойынша төлемдерді кейінге қалдыруды беру тәртібі бекітілді.

«7-20-25» және «Баспана хит» ипотекалық бағдарламалары төлемдер уақытының шегерілуі осы ереже аясында жұмыс істейді» деп хабарлады қор.

Тәртіпке сәйкес, банктер 2022 жылғы 5 қаңтардан 5 сәуірге дейінгі мерзімге кейінге қалдырылған төлемдерді ұсынады.

Төлемді кейінге қалдыру қарыз алушының несиелік тарихына әсер етпейді.

Төлемді шегеру үшін не істеу керек?

Ол үшін қаржылық жағдайдың нашарлауын растайтын құжаттарды қоса бере отырып, банкке еркін нысандағы өтінішпен жүгіну керек.

Өтініш электрондық пошта, онлайн «банк-клиент» жүйесі, интернет-ресурс, мобильді қосымша, басқа да байланыс құралдары арқылы немесе қарыз алушының банк бөлімшесіне өзі келу арқылы беріледі.

Өтінімдерді қарау мерзімі 10 жұмыс күнін құрайды.

Кейінге қалдыру туралы өтініштер 2022 жылдың 4 сәуіріне дейін (қоса алғанда) қабылданады.