60 мың теңгелік жүргізуші куәлігі туралы не білу керек?

«Азаматтарға арналған үкімет» мемлекеттік корпорациясы қазақстандықтарға жүргізуші куәлігін ақшаға сатып алуды ұсынатын 30-ға жуық пост пен хабарламаны анықтады.

«Алаяқтар қарапайым схема бойынша әрекет етеді: клиент оларға қоңырау шалған кезде олар 50-60 мың теңге сұратып, құжатты бір ай күту керектігін айтады. Төлемді алғаннан кейін олар телефондарын өшіріп тастайды» деді Азаматтарға арналған үкімет.

Олардың айтуынша, мұндай хабарламалар тұрақты түрде қадағаланып, барлық қажетті деректер жинақталып, құқық қорғау органдарына беріледі. Мәселен, сәуір айында ҚР Ішкі істер министрлігіне жүргізуші куәлігін алуға заңсыз көмек көрсетудің 12 фактісі бойынша ақпарат келіп түскен.

«Жүргізуші куәлігін арнайы қызмет көрсету орталығында тиісті емтихандарды тапсырғаннан кейін ғана алуға болады. Емтихандар келесі реттілікпен қабылданады: алдымен теориялық, содан кейін практикалық. Сондай-ақ жүргізуші куәлігі үшін 1,25 АЕК (3 975 теңге) көлемінде мемлекеттік баж салығын төлеу қажет» деді мемлекеттік корпорациядан.

Теориялық емтихан: 40 сұраққа 40 минут ішінде жауап беру керек. Емтиханнан өту үшін 32 сұраққа дұрыс жауап беру керек.

Одан кейін сыртқы аулада көлікті жүргізу емтиханы тапсырылады. 20 минут ішінде 12 жаттығуды орындау керек. Екі емтиханды да сәтті тапсырған адамға жүргізуші куәлігі беріледі.