6 сарбазды соққыға жыққан аға сержант жазадан құтылды

27 жастағы аға сержант тараптардың татуластығына байланысты қылмыстық жауапкершіліктен босатылды, деп хабарлайды Orda.kz. 

Ақтөбе сотында Маңғыстау облысында орналасқан 25744 әскери бөлімінің 1-шабуылдау батальонының оқ ату арқылы қолдау ротасының аға сержантының ісі қаралды. 

Сотта әскери қызметші сарбаздардың жатын бөлмесіне кіріп, үш бірдей мерзімді әскери қызметшіні басынан жұдырықпен ұрғаны мәлім болды. Бұл әрекетке қатардағы жауынгердің казарма дәлізінде оның рұқсатынсыз жүргені себеп болған. Тағы бір жағдайда ол батальондағы қатардағы жауынгерді насыбаймен ұстап алып, сол үшін әскерге шақырылған үш азаматтың бетінен шапалақпен, тағы екеуін жұдырықпен басынан ұрған. 

Айыпталушы өз кінәсін толық мойындағанымен, жәбірленушілердің арқасында жазадан босатылған. Ол соққыға жыққан алты әскери қызметші оған ешқандай шағымы жоқ екенін айтып, өзара татуласқан. Сол себепті ер адам қылмыстық жауапкершіліктен босатылды.