«500 мың теңгеге өлтірді»: Атырауда Яна Легкодимованы өлтіру ісі бойынша сот басталды

Атырау облысының қылмыстық істер жөніндегі мамандандырылған ауданаралық сотында жас қыз Яна Легкодимованы қатыгездікпен өлтіру ісі бойынша сот тыңдауы басталды, деп хабарлайды Orda.kz.

Янаны тұншықтырып өлтіріп, денесін Жайық өзеніне тастап жіберген.

Айыпталушылар орындығында — Құрманғазы ауданының тұрғындары 24 жастағы Ризуан Хайржанов пен 25 жастағы Алтынбек Қатимов. Оларға алдын ала сөз байласу арқылы топ болып адам өлтірді және ұрлық жасады деген айып тағылған. Қатимовқа тапсырыспен «кісі өлтіру» бабы қосылған.

Тергеу нұсқасы бойынша, Яна Хайржановпен кездесіп жүрген және оның басқа қызы барын білмеген. Яна бұл жайлы айтпақ болғанда, Хайржанов одан құтылуды шешіп, Қатимовқа көмегі үшін 500 мың теңге ұсынған. 2024 жылдың 19 қазанына қараған түні ол  қызды көлікте тұншықтырып, денесін өзенге тастаған.

Янаның сүйегі биыл жазда табылып, кейінірек танылған. Істі судья Зарема Хамидуллина жүргізіп отыр. Айыптаушы тараптың дәлелдері — әлеуметтік желідегі бір-біріне жазбалар куәгерлердің түсініктемелері, сараптама қорытындылары және өзге де дәлелдемелер.

Сот процесін Атыраудағы біздің тілшіміз бақылап, алдағы уақытта ақпарат таратып отырады.