500-ден астам мемлекеттік құзірет министрліктер мен әкімдіктерге өтеді

500-ден астам мемлекеттік функциялар министрліктер мен әкімдіктерге беріледі, деп хабарлады Премьер-Министрдің баспасөз қызметі.

— 500-ден астам мемлекеттік функциялар министрліктер мен әкімдіктерге берілген. Бұл заң жобасымен біз министрлер мен олардың орынбасарларының тәуелсіздігін күшейтеміз. Енді барлық ағымдағы салалық мәселелер министрлердің бұйрықтарымен қабылданатын болады, - деді Премьер-Министр Әлихан Смайылов сейсенбі күнгі жиында.

Жиында Премьер-Министр кеңсесін мемлекеттік аппаратқа айналдыру, Экология, геология және табиғи ресурстар министрлігін қайта құру, сондай-ақ салалық тұжырымдамалар мен даму жоспарларын әзірлеу мәселелері талқыланды.

— Ол үшін саланың  құрылымы  мен оның құзыреті  оңтайландырылатын болады. Үкімет пен Премьер-Министрдің қызметін сараптамалық-талдау жұмыстары, ұйымдастырушылық-құқықтық қамтамасыз ету күшейтіледі. Аппарат президент әкімшілігімен бірлесіп, бюрократтықты жою және шешім қабылдау рәсімдерін шектен тыс реттеуді жою бойынша жұмысты жалғастырады, - деді Смайылов.

Белгілі болғандай, Экология, геология және табиғи ресурстар министрлігі Экология және табиғи ресурстар министрлігі болып қайта құрылды. Жер қойнауын геологиялық барлау және минералдық-шикізат базасын молайту саласындағы құзырет  пен өкілеттіктер Индустрия және инфрақұрылымдық даму министрлігіне берілді.

— Индустрия министрлігінің негізгі міндеттерінің бірі – жер қойнауын игеруге инвестиция тарту. Геологиялық ақпараттың бірыңғай деректер банкін коммерциялық пайдалануға енгізуді аяқтау қажет, - деді Смайылов.

Смайылов үкіметке экономикалық өсуді нақты мәнде 4%-ға қамтамасыз етуге, инфляцияны 9,5%-ға дейін екі есе төмендетуге және 2023 жылы 24,4 млрд доллар тікелей шетелдік инвестиция тартуға шақырады.