5 елдің қорғаныс министрі Ақтауда бас қосты

Ақтауда «Бірлестік-2024» халықаралық оқу-жаттығуына қатысушы елдердің қорғаныс министрлері түрлі әскери нысандарды аралады.

Бұл туралы қорғаныс министрлігі хабарлады.

Министр Руслан Жақсылықов Әзірбайжан, Қырғызстан, Тәжікстан және Өзбекстаннан келген әріптестеріне қазақстандық бөлімшелердің жауынгерлік даярлық мүмкіндіктерін таныстырды.

Сапар Қазақстан Әскери-теңіз күштерінің зымыран-артиллериялық кемесінен басталып, қонақтарға кеменің жауынгерлік мүмкіндіктері мен міндеттері көрсетілді. Одан кейін, делегациялар сүңгуір орталығында болып, жауынгерлік жүзушілерді дайындауда қолданылатын қару-жарақ пен техникалық құралдарды қарап шықты.

25744 әскери бөлімінде министрлерге теңіз жаяу әскерлерін жаттықтыруға арналған тренажерлар көрсетілді. «Оймаша» полигонында олар әскери қызметшілерді орналастыру және тамақтандыру жағдайымен танысты.

Сапар соңында министрлер «Батыс» жедел қолбасшылығы әскерлерінің біріккен тобын басқару орталығында болып, оның мүмкіндіктерімен және оқу-жаттығудың тұжырымдамасымен танысты.