480 ауылды дамытуға 106 млрд теңге бөлінді – Әсет Ерғалиев

Ұлттық экономика министрі Әсет Ерғалиев Үкімет отырысында «Ауыл – Ел бесігі» жобасы жүзеге асырылып жатқанын айтты.

Бұл туралы Orda.kz primeminister.kz сайтына сілтеме жасап хабарлайды.

– Жобаның мақсаты инфрақұрылымды жаңғырту есебінен, оны жаңа өңірлік стандарттар параметрлеріне жеткізе отырып, ауыл тұрғындарының өмір сүру деңгейін арттыру болып табылады. Алға қойылған мақсатқа қол жеткізу үшін әлеуметтік және инженерлік инфрақұрылымды дамыту, ауыл тұрғындары үшін әлеуметтік және мемлекеттік қызметтердің қолжетімділігін қамтамасыз ету, сондай-ақ өмір сүруге жайлы орта құру бойынша шаралар іске асырылуда. Жобаның шеңберінде 3,5 мыңнан астам перспективалы ауыл айқындалды, онда еліміздегі ауыл халқының 90%-ға жуығы тұрады. Атап айтсақ, 1 173 тірек және 2 388 серіктес ауыл іріктелді», — деді Ә. Ерғалиев.

«Ауыл - Ел бесігі» жобасын іске асыру ауыл халқының өмір сүру сапасы мен әл-ауқатын арттыруды қамтамасыз ететінін айтқан Ерғалиев ауылдық аумақтарды дамытуға қанша қаражат жұмсалғанын жеткізді.

– Қазіргі таңда өңірлерде 400-ден астам жоба аяқталды, қалған жобалар жылдың соңына дейін аяқталатын болады. Жалпы 2019-2021 жылдары мемлекеттік бағдарламалар бойынша және жеке инвестициялар есебінен ауылдық аумақтарды дамытуға 1,2 трлн теңге бағытталды. Келесі 4 жыл ішінде 1,3 трлн теңге бөлінеді,оның ішінде «Ауыл – Ел бесігі» шеңберінде – 670 млрд теңге, — деді ұлттық экономика министрі.