41 күн интернетсіз қалған Жетісу тұрғындарының ақшасы қайтарылады

Сот Жетісу тұрғындарын 41 күн интернетсіз қалдырған байланыс операторын өтелген қаражатты  қайтаруға міндеттеді, деп хабарлайды Orda.kz.       

Жетісу облысының Сауда және тұтынушылардың құқықтарын қорғау департаменті сот арқылы ұялы байланыс пен интернет қызметтері үшін ақы төлеп, бірақ 41 күн бойы бұл қызметтерді нақты ала алмаған тұрғындарға өтемақы өндіріп беру туралы шешім шығарды.

Істің мән-жайын айта кетсек, 2025 жылғы 10 қазан мен 19 қараша аралығында облыстың бір ауданында байланыс қызметтері жұмыс істемеген. Соған қарамастан оператор ай сайынғы абоненттік төлемді (айына 11 670 теңгеден бастап) алуды жалғастырған.

Бұл жағдай елеулі қиындықтар туғызып,  ересектер жедел қызметтерге хабарласа алмаған, ал балалар қашықтан оқу мүмкіндігінен толық айырылған.

 Тұтынушылардың шағымына жауап ретінде оператор инфрақұрылымның жоқтығын алға тартқан, алайда абоненттерді алдын ала ескерткенін растайтын дәлел ұсына алмаған.

Департаменттің талап-арызы бойынша сот медиативтік келісім бекітті. Соның негізінде байланыс операторы тұтынушыларға 234 657 теңгеден қайтарды. Ал жалпы өндіріп алу талап етілген сома 315 538 теңге болған.

Сот құпиялылығы бойынша оператор нақты аталмағанымен тұрғындар ел аумағында осындай жайттың жиі қайталанатынын біледі және ол кез-келген қызмет көрсетушіге тән болуы мүмкін. Айтпағымыз: осындай жағдайларға қатысты  Сауда және тұтынушылардың құқықтарын қорғау департаментіне  талап-арыз түсіріп, кез-кеген азамат өз құқықын қорғай алады.

Оқи отырыңыз:

• Фискалдық деректер операторы нарығында қолайлы қызмет іске қосылды
• Tele2 және Altel пайдаланушылары байланыс ақауларына шағымданып жатыр
• 25 желтоқсаннан бастап бірден үш мобильді оператор тарифтерін қымбаттатады