4 жасында ұрланған бала 33 жылдан кейін анасын тапты

Сәби кезінде жоғалып кеткен бала 33 жылдан кейін анасын тапты. Оны 4 жасында біреулер ұрлап әкетіп, сатып жіберген. Қытай тұрғыны есінде қалған жерлерді қағазға түсіріп, қолдан карта жасап, сол арқылы анасын тапты.

South China Morning Post басылымының хабарлауынша, ұрланған Ли Цзинвэй туған ауылынан мың шақырым жерде балаға зар болған отбасында өскен.

Ол өмірін туған үйін ұмытпауға арнаған. Бірақ дегенмен уақыт өзінікін алған: ол өз аты мен ауылының атын ұмытып қалған.

Ер жеткен Ли Цзинвэй есінде қалған тау-тастың суретін қағазға түсіріп, қолдан карта жасаған. Оған желі қолданушылары мен полицейлер көмектескен. Ақыры ол араға 33 жыл салып, анасымен қауышқан.

Басында полицейлер болжамды түрде бір әйелді тапқан, ДНҚ ол Ли Цзинвэйдің анасы екенін растаған. Бірақ Қытай тұрғынына әкесімен жолығу бұйырмапты, ол дүниеден озып кеткен.

Анасы мен ұлы 33 жылдан кейін, 2022 жылдың 1 қаңтарында кездеседі.