4 күн бойы Ресей шекарасында тұрған қазақстандықтар үкіметке үндеу жасады

Қазақстандықтар шекарадағы кезектің кесірінен үш күннен бері елге кіре алмай отыр. Олардың айтуларынша, көбінің қорлары таусылып жатыр. Осы ретте кейбір іскер азаматтар сол жерде кәсіп ашып, нан мен суды жоғары бағамен сатып жатыр.

Орал қаласының тұрғыны Александр отбасымен шекарада төртінші күннен бері кезекте тұрғанын айтты.

 — 24 қыркүйекте біз Маштаков өткізу бекетіне дейін бардық. Ал постқа келсек кезек көп. Екі күннен бері кезек әрең алға жылжыды. Тек жүк көліктері жүреді, оларды өткізеді. Біз, қазақстандықтар, өз елімізге орала алмай тұрмыз. Бізбен бірге балаларымыз да бар, біз сияқтылар көп. Барлығымыз жиналып, шекарашыларға бардық, бірақ мәселе шешілмей жатыр, - дейді ер адам.

Ол адамдарды шекарадан өткізетін такси жүргізушілеріне шағым айтты.

 — Олар адамдарды осы жерден алып, бірге шекарадан өтіп, қай жерден кеткен болса, сол жерге қайтады. Өйткені, байқасаңыз, дүкендегі «әріптестері» оны сонда күтеді. Осылай жалғаса береді. Такси жүргізушілері шекарадан өткені үшін бір адамнан 6-7 мың рубль (57 мың теңге) алады, - дейді Александр.

Оның айтуынша, Маштаков бекетіндегі кезек 45-50 шақырымға созылған. Көптеген адамдардың азық-түліктері таусылып жатыр. Кейбір «саудагерлер» мұнда кәсіп ашып үлгерген, алайда, оны кез келген адамның қалтасы көтере бермейді.

 — Бір бөлке нан 1500 теңге, судың литрі 700 теңге. Бұл сұмдықтың бір түрі. Сіз оны реттей алмайсыз ба? Қазақстандық шекарашылар бұл такси жүргізушілерді біраз уақытқа дейін кіргізбей немесе билік пен күш құрылымдары қазақтарды кезектен шығаруға келісім берсе болар еді, - дейді ол.

Бұған дейін Ақтау тұрғындары да осындай талап қойған болатын. Олар да шекарадан үйлеріне қарай өте алмай қалған.