Батыс Қазақстанда өрт шықты

Батыс Қазақстан облысы Ақжайық, Бәйтерек және Теректі аудандарында ауа температурасының жоғарылауы салдарынан өрт шықты.

Бұл туралы Orda.kz хабарлайды.

Төтенше жағдай министрлігі баспасөз қызметі таратқан ақпаратқа сәйкес, өрт ауданы шамамен 480 гектар болады, оның 90 гектары орман алқабы болса, 390 гектары құрғақ шөп.

БҚО Төтенше жағдайлар департаментінде, сондай-ақ өрт ошақтарында жедел штаб құрылды.

Жоғарыда аталған өрттерді жоюға БҚО ТЖД бөлімшелерінің, «Өрт сөндіруші» АҚ, «Қазавиақұтқару» АҚ, кенттік округтер мен шаруа қожалықтарының ерікті өрт сөндіру құрылымдары және Ормандар мен жануарлар дүниесін қорғау жөніндегі инспекцияның күштері мен құралдары қатысты.

Өртті әуеден сөндіру үшін «Қазавиақұтқару» тікұшағы жұмылдырылды. Өрт ошақтарына 198 текше метр су құйылды.

Өрттен қаза болғандар мен зардап шеккендер жоқ. Өрттің себептері, материалдық шығын анықталуда.
ТЖМ өрт қауіпсіздігі ережелерін сақтау қажеттілігін еске салады. Өрт шыққан жағдайда дереу құтқару қызметінің «101» немесе «112» телефондарына қоңырау шалыңыз.