«37-ші секундта нокаутқа жіберді»: Аружан Жаңабаева бокстан Азия чемпионы атанды

Қазақстандық Аружан Жаңабаева Шри-Ланкада өткен Азия чемпионатының финалында қарсыласын 37-ші секундтан соң нокаутқа жіберіп, чемпион атанды, деп хабарлайды Orda.kz.

ҚР Спорт және дене шынықтыру істері комитетінің баспасөз қызметінің хабарлауынша, Аружан Жаңабаев Азия Чемпионаты (U22) жеңімпазы атанып, еліміздің намысын қорғады.

«Аружан Жаңабаева Шри-Ланкада өтетін бокстан Азия чемпионатының (U22) финалында Қазақстанның жетінші боксшысы рингке шықты. 63 келіге дейінгі салмақ дәрежесінде Аружан Жаңабаева турнирдің қожайыны Мудиансе Наякаразнаны жеңді. Жекпе-жек бірінші раундта аяқталды. Небәрі 37 секундтан соң жеңіп шықты», — деп мәлімдеді комитет.

Осылайша Аружан елімізден аттанған 9 қазақстандықтың ішінен алғаш алтын алған боксшы болды.

Бұған дейін медаль алған боксшылар: Элина Базарова (54 кг), Виктория Байдукова (57 кг), Анар Тұрсынбек (60 кг), Ұлдана Таубай (66 кг), Бақыт Сейдіш (70 кг), Шұғыла Нәлібай (75 кг), Жібек Жарасқызы (81 кг) және Әсел Тоқтасын (өте ауыр салмақта).