34 миллионды қолды еткен кәсіпкер Германиядан қайтарылды

34 миллион теңгеден астам қаржы жымқырды деген күдікке ілінген кәсіпкер Айдос Қанатұлы Германиядан Қазақстанға экстрадицияланды.

Бұл туралы Orda.kz хабарлады.

«ҚР Бас прокуратурасы мен Ішкі істер министрлігінің қызметкерлері 1989 жылы 16 қыркүйекте туған Қазақстан азаматы Айдос Қанатұлы Шәріповті Германиядан экстрадициялады. Шәріпов Еуроодақ елдерінде (Литва, Норвегия, Германия, Дания, Финляндия) жұмысқа орналасам деген желеумен жеке кәсіпкер ретінде жұмыс істеп жүріп, Қазақстан азаматтарына ірі көлемде зиян келтірген деген күдікке ілінді» деді ҚР Бас прокуратурасының баспасөз қызметі.

Кәсіпкер 60-тан астам адамға 34 миллион шығын келтірді.

Қылмыс жасалғаннан кейін күдікті қылмыстық қудалау органдарынан қашып кеткен, осыған байланысты оған халықаралық іздеу жарияланған. Қазіргі уақытта А.Қ. Шәріпов Нұр-Сұлтандағы уақытша ұстау изоляторына қамалды.