337 айыпталушы өмір бойына бас бостандығынан айырылды

Анкара қаласының соты 2016 жылғы төңкеріс әрекеті бойынша 337 айыпталушыны өмір бойына бас бостандығынан айыруға үкім шығарды, деп хабарлайды DW. Сот ісі 2017 жылдың шілдесінен басталып, бұл іске 500 адам айыпталған.

Олар конституцияны бұзуға, президентті өлтіруге және кісі өлтіруге кінәлі деп танылды. Тағы 60 сотталушыға басқа мерзімге бас бостандығынан айыру жазасы кесілді. 75 сотталушы ақталды.

Түркия президенті Реджеп Тайип Ердоғанның үкіметіне қарсы путчтық әрекетке қатысты іс бойынша 500-ге жуық айыпталушы болды. Сотталушылардың арасында түрік әуе күштерінің офицерлері мен ұшқыштары бар. Ұшқыштар төңкеріс әрекеті кезінде Анкарадағы ғимараттарды бомбалаған, ал офицерлер Түркия астанасының маңындағы Акынджы әскери базасынан көтерілісшілерді басқарғаны үшін кінәлі деп танылды.

Процесс 2017 жылдың шілде айының соңынан бастап Анкара маңындағы Синджан түрме кешені аумағында жүріп жатыр. Ол үшін бір жарым мың адамға арналған зал арнайы салынған. Үкім шыққан күні үй-жайға адам сыймай кетті, деп хабарлады ВВС.

2016 жылдың 15 шілдесінде қастандық жасаушылар Акинджи әуе базасын басып алып, бас штаб бастығы Хулуша Акарды кепілге алды. Олар билікті «конституциялық құрылысты, адамның құқықтары мен бостандықтарын қалпына келтіру үшін» өз қолдарына алатынын жариялады. Сол кезде Жерорта теңізі курорты Мармаристе демалып жатқан президентті қастандықшылар қолға түсіре алмады. Оның жақтаушылары қалалардың көшелеріне шығып, әскерилермен қақтығысқа түсті.

Акинджидегі базадан шыққан F-16 ұшақтары парламент ғимаратына, сондай-ақ президент сарайы мен Анкара арнайы жасағы мен полициясының штаб-пәтеріне жақын жолға үш рет оқ жаудырды. Келесі күні бүлікші әскери күштер капитуляция жасады.

2016 жылғы шілдедегі төңкеріс әрекеті нәтижесінде, ресми мәліметтер бойынша, 250-ден астам адам қаза тауып, екі мыңға жуық адам жараланды. Түркия басшылығы көтерілісті 1999 жылдан бері АҚШ-та эмиграцияда жүрген ислам радикал уағызшысы Фетхуллаһ Гүленнің қозғалысы үшін айыптады. Гүлен төңкеріске қатысты айыптауларды жоққа шығарды. Төңкерістен кейін Реджеп Тайып Ердоған елде жаппай тазартуды жүзеге асырды. 100 мыңға жуық мемлекеттік қызметкерлер, мұғалімдер мен судьялар жұмыстан шығарылды, 2,5 мыңнан астам адам өмір бойына бас бостандығынан айырылды.