31 млн теңге тұратын айдаладағы дәретханада унитаз жоқ

Абай облысында 31 562 600 теңгеге салынған қоғамдық дәретхана әлі күнге дейін жұмыс істемей, тіпті ішінде унитазы да жоқ. Ол Семейден Қарауылға баратын жол бойында орналасқан. 

Бұл туралы «Әділдік жолы» республикалық қоғамдық бірлестігінің төрағасы Дидар Смағұлов хабарлады.

«31 562 600 теңге тұратын дәретханада қарапайым унитаз да жоқ. Ең арзан «Генуя чашасы» орнатылған, былайша айтқанда бұрынғы замандағыдай тесік. Құжатта қарастырылған жылыту жүйесі мен интеллектуалды бейне бақылауды да көрмедім. Ақша қайда деген сұраққа Антикор жауап береді деп сенемін» деп жазды Смағұлов.

Смағұловтың айтуынша, жергілікті шенеуніктер бұл дәретхананы «Семей жолдары» ЖШС орындаған жолдарды күтіп ұстау жұмыстарына енгізген. Жолдарды күтіп ұстауға 1,5 жылда 2 миллиард теңгеден астам қаражат жұмсалған.

Ішкі мемлекеттік аудит департаментінің мәліметі бойынша, дәретхананы 2024 жылдың 16 ақпанында Абай облысының жолаушылар көлігі және автомобиль жолдары басқармасының бұрынғы басшысы Асылбек Нұғманов қабылдаған. Бірақ ол бір ай бұрын өз ұстанымын өзгерткен.

Ведомство қазір коммерциялық сараптама жүргізу қажет екенін, бірақ қаражаттың жоқтығын айтты. Осыған байланысты Абай облысы Сыбайлас жемқорлыққа қарсы қызметі бұл дәретханаға назар аударды.

Дидар Смағұлов қымбат дәретхана ғимаратына кірген. Ол күзетшіге  бірнеше қоңырау шалғаннан кейін дәретхананы екі адам күзететінін анықтаған.

Нысанға электр қуаты да, су да қосылмаған. Шатыры қисайып, құлап жатыр.

Құрылыс сапасы мен материалдарының арзан болғанын және жұмыстың сапасыз орындалғанын көрген Смағұлов таңданысын жасырмады.

«1500 шақырым жол жүргеннен кейін мұндай сәнді дәретхана көремін деп күтпедім» деп жазды ол.

Смағұловтың айтуынша, мұндай дәретханалардын екеуі салынған.