3 адамды өлтіріп, 10 жылға сотталған адам неге Esentai Mall-да қыдырып жүр?

Алматыда 3 адамның қазасына себепші болып, 10 жылға сотталған ер адамның Esentai Mall сауда орталығында қыдырып жүргенінің әлеуметтік желіде тарап кетуіне қатысты қылмыстық-атқару жүйесі комитеті түсініктеме берді, деп хабарлайды Orda.kz.

Сотталған Ілияс Кардың Esentai Mall-да жүргені жайлы ақпаратқа қатысты комитет мәліметінше, Кар жазасын колония-қоныста өтеп жатыр екен. Заңға сәйкес мұндай мекемеде отырғандарға жұмысқа орналасу, ем алу немесе демалыс кезінде мекемеден шығуға рұқсат берілген. 

Сонымен қатар, сотталушының демалыс кезінде ішкі істер органдарының бақылауында болғанын, ал қазір қайтадан мекемеге оралғанын айтты комитет.

«Сотталушының жеке өтініші негізінде оған мекемеден тыс жерге шығуға рұқсатпен демалыс берілді. Демалыс кезінде ешқандай құқық бұзушылыққа жол берілмеді», – деді ҚАЖ.

Қаза тапқандардың туысы Ілияс Кардың  Esentai Mall-да еркін жүргенін айтып, жазба жариялады. 

Айта кетейік, Ілияс Кар мас кезінде 2018 жылдың 29 желтоқсанында Алматыда Mercedes Gelandewagen көлігімен Mitsubishi Galant-қа соғылып, қайғылы апатқа себепші болды. Садарынан Mitsubishi көлігінде 3 адам қайтыс болып, 1 адам жансақтау бөліміне түскен.

Сот оны қылмыстық кодекстің 345-бабы 4-бөлігі «екі немесе одан да көп адамның өліміне әкелген жол қозғалыс ережелерін бұзу» бойынша 10 жылға бас бостандығынан, 7 жылға көлік жүргізу құқығынан айырды. Сондай-ақ 347-бап «жол-көлік оқиғасы болған орынды тастап кету» бойынша қосымша 2 жылға сотталды. Ол жазаасын Таразда өтеп жатыр.