250-ден астам оқушы халықаралық олимпиадаларда жүлде алды

Жыл басынан бері Қазақстанның 250-ден астам оқушысы халықаралық олимпиадаларда жүлделі орындарға ие болды, деп хабарлады Білім министрлігінің баспасөз қызметі.

«Ағымдағы жылдың басынан бері негізгі пәндер бойынша халықаралық олимпиадаларда 252 қазақстандық оқушы жүлдегер атанды. Жас дарындар ел қазынасына 45 алтын, 78 күміс және 129 қола медаль әкелді»  делінген сенбі күні таратқан хабарламада.

Балалар халықаралық қашықтықтағы Азия-Тынық мұхиты математикалық олимпиадасы, «Жібек жолы» халықаралық математикалық олимпиадасы, математикадан Балқан олимпиадасы, химиядан оқушыларға арналған халықаралық Менделеев олимпиадасы, Азия олимпиадасы (OlympiadOlympiades of Philadelphia), математика, физика және информатикадан халықаралық Жәутіков олимпиадасы сияқты беделді құрлықтық олимпиадаларда Қазақстанды табысты таныстырды.

— Биылғы жылы халықаралық пәндік олимпиадаға қатысушылар саны 600 оқушыға артты. 27 оқушы өткен жылдардың рекордын жаңартып, ең беделді жеті халықаралық олимпиадада – IMO, IPhO, IBO, IOL, IchO және т.б. жеңімпаз атанды. Қатысу тарихында алғаш рет осы олимпиада жеңімпаздары 73 миллион теңгеден астам сыйлыққа ие болды, сонымен қатар оларға отандық жоғары оқу орындарында оқуға гранттар берілді. Келесі жылы балаларға осындай қолдау көрсетілетін олимпиадалардың тізімі жетіден 14-ке дейін артады, - деді орта білім беру комитетінің төрайымы Гүлмира Кәрімова.

Алтын медаль алған оқушыға 1500 ең төменгі есептік көрсеткіш (АЕК), күміс медаль үшін – 1000 АЕК, қола медаль үшін – 500 АЕК көлемінде ақшалай сыйақы берілетіні атап өтілді.