«25 тамызға дейін»: Асқар Мамин вакцина бойынша жаңа тапсырма берді

Денсаулық сақтау министрі Алексей Цойдың айтуынша, Қазақстанда эпидемиологиялық жағдайдың біртіндеп тұрақталуы байқалады.

Бұл туралы Orda.kz хабарлайды.

– Соңғы үш апта ішінде Қазақстанда эпидемиологиялық жағдайдың біртіндеп тұрақталуы байқалды, аптасына орта есеппен 53 мыңға жуық жағдай тіркелді. 1 тамыздан бастап Қазақстанда коронавирус инфекциясының таралу индексі 14 пайызға төмендеді - деді Цой үкімет отырысында.

Цой атап өткендей, елдің медициналық ұйымдары тұрақты жұмыс істеуде. Бүгінде 120 мыңнан астам адам коронавируспен емделіп жатыр.

Өз кезегінде Премьер-министр Асқар Мамин Маңғыстау, Атырау, Қостанай және Батыс Қазақстан облыстарында вакцина салу қарқынын арттыруды тапсырды.

– Алматы, Шымкент қалаларында және Түркістан облысында вакциналаудың жақсы көрсеткіштерін атап өту қажет. Бұл ретте Маңғыстау, Атырау, Қостанай және Батыс Қазақстан облыстарында вакцина салдыру қарқынын айтарлықтай арттыру қажет.

Вакциналар қорын толықтыру шаралары жүргізілуде. 25 тамызға дейін мұғалімдерге вакцина салуды аяқтаңыз және білім беру мекемелерінің дайындығына бақылауды күшейтіңіз, - деді Мамин.