24 наурыз Ресейде ұлттық аза тұту күні болып жарияланды

24 наурыз Ресейде ұлттық аза тұту күні болып жарияланды. Бұл туралы Владимир Путин ел азаматтарына жолдауында айтты. Құрбан болғандар саны бойынша Крокус Сити Холлдағы теракт Мәскеудегі ең ірі терактілердің біріне айналды, деп хабарлайды Orda.kz.

22 наурыз күні кешке Мәскеу мен Мәскеу облысындағы ең үлкен концерттік залдардың бірі Крокус Сити Холлда бір топ ер адам автоматтан оқ жаудырып, кейін өрт шыққан. Концерт залы толығымен жанып кеткен. Осы уақытқа дейін ғимараттағы өрт салдары түгел жойылған жоқ.

Алдын ала мәлімет бойынша, қаза тапқандар саны 133, оның ішінде үш бала және 140-тан астамы жараланған. Тергеу комитеті зардап шеккендердің саны әлі де өсетінін баса айтты. Терактіге тікелей қатысы бар төрт адам ұсталды, деді ел президенті ресейліктерге жолдауында. Бұл іс бойынша барлығы 11 адам қамауға алынды.

«Мәскеуде және Мәскеу облысында, еліміздің барлық аймақтарында лаңкестікке және диверсияға қарсы қосымша шаралар енгізілді. Ендігі ең бастысы – осы қантөгістің артында тұрғандардың басқа қылмыс жасауына жол бермеу»,- деді Путин.